| ᠮᠤᠩᠭᠤᠯ ᠪᠦᠭᠡ ᠶᠢᠨ ᠵᠤᠳᠤᠭ ᠭᠡᠵᠤ ᠮᠠᠰᠢ ᠦᠪᠡᠷᠮᠢᠴᠠ ᠭᠡᠷᠡᠭᠯᠡᠯ ᠪᠠᠶᠢᠳᠠᠭ᠃ ᠦᠨᠦᠳᠤᠷ ᠤᠨ ᠨᠠᠶᠢᠷ ᠤᠨ | ᠪᠦᠭᠡ ᠵᠤᠳᠤᠭ ᠦᠭᠡᠢ ᠪᠠᠷᠢᠯᠳᠤᠬᠤ ᠦᠭᠡᠢ᠃ ᠭᠡᠪᠡᠴᠤ ᠮᠤᠩᠭᠤᠯ ᠪᠦᠭᠡ ᠤᠤᠯ ᠠᠴᠠ ᠪᠠᠨ ᠵᠤᠳᠤᠭ ᠦᠭᠡᠢ | ᠪᠠᠶᠢᠭᠰᠠᠨ ᠭᠡᠭᠦ ᠶᠢ ᠪᠠᠳᠤᠯᠠᠬᠤ ᠡᠷᠳᠡᠨ ᠤ ᠵᠢᠷᠤᠭ ᠤᠯᠳᠠᠪᠤᠷᠢ ᠶᠢ ᠬᠠᠳᠠᠨ ᠠᠴᠠ᠂ ᠤᠩᠭᠤᠨ ᠪᠤᠯᠠᠰᠢᠨ ᠠᠴᠠ | ᠤᠯᠤᠭᠰᠠᠨ ᠪᠠᠶᠢᠳᠠᠭ᠃ ᠳᠡᠭᠡᠪᠡᠯ ᠮᠤᠩᠭᠤᠯ ᠪᠦᠭᠡ ᠶᠢᠨ ᠵᠤᠳᠤᠭ ᠶᠠᠮᠠᠷ ᠦᠶᠡ ᠳᠤ ᠪᠤᠢ ᠪᠤᠯᠤᠭᠰᠠᠨ ᠭᠡᠳᠡᠭ ᠤᠨ | ᠳᠤᠬᠠᠢ ᠦᠨᠦᠳᠦᠷ ᠪᠢᠳᠡᠨ ᠳᠤ ᠦᠵᠡᠭᠦᠯᠵᠤ ᠬᠠᠷᠠᠭᠤᠯᠬᠤ ᠪᠠᠷᠢᠮᠳᠠ ᠦᠭᠡᠢ ᠪᠠᠶᠢᠨᠠ᠃ ᠭᠡᠳᠡᠯᠡ ᠵᠤᠳᠤᠭ ᠤᠨ | ᠠᠩᠬᠠᠨ ᠤ ᠭᠡᠯᠪᠡᠷᠢ ᠪᠤᠯ ᠪᠦᠰᠡ ᠪᠠᠶᠢᠭᠰᠠᠨ ᠭᠡᠭᠦ ᠦᠵᠡᠯᠳᠡ ᠶᠢ ᠪᠢ ᠪᠠᠷᠢᠵᠤ ᠶᠠᠪᠤᠳᠠᠭ᠃ ᠮᠤᠩᠭᠤᠯ ᠪᠦᠭᠡ ᠶᠢᠨ | ᠳᠡᠤᠭᠡᠨ ᠪᠠᠶᠢᠳᠠᠯ ᠠᠴᠠ ᠦᠵᠡᠪᠡᠯ ᠪᠢᠳᠡ ᠶᠡᠭᠡ ᠡᠷᠳᠡ ᠠᠴᠠ ᠪᠠᠷᠢᠯᠳᠤᠭᠠᠨ ᠳᠤ ᠪᠠᠷᠢᠴᠠ ᠪᠤᠯᠭᠠᠨ ᠶᠠᠭᠤ ᠨᠢᠭᠡ ᠶᠢ | ᠠᠰᠢᠭᠯᠠᠬᠤ ᠪᠠᠶᠢᠳᠠᠯ ᠵᠠᠩᠰᠢᠵᠤ ᠰᠠᠭᠤᠭᠳᠠᠭᠰᠠᠨ ᠪᠠᠶᠢᠨᠠ᠃ ᠳᠡᠭᠡᠭᠡᠳ ᠮᠤᠩᠭᠤᠯᠴᠤᠳ ᠦᠪᠡᠷ ᠤᠨ ᠬᠠᠮᠤᠭ | ᠦᠷᠭᠡᠨ ᠭᠡᠷᠡᠭᠯᠡᠳᠡᠭ ᠪᠦᠰᠡ ᠪᠠᠷ ᠢᠶᠠᠷ ᠮᠦᠷᠦ ᠪᠦᠰᠡᠯᠡᠭᠦᠷ ᠢᠶᠠᠨ ᠤᠷᠢᠶᠠᠨ ᠳᠡᠭᠦᠨ ᠠᠴᠠ ᠪᠠᠷᠢᠴᠠ ᠭᠠᠷᠭᠠᠨ | ᠪᠠᠷᠢᠯᠳᠤᠵᠤ ᠪᠠᠶᠢᠭᠰᠠᠨ ᠪᠠᠶᠢᠨᠠ᠃ ᠡᠭᠦᠨ ᠠᠴᠠ ᠤᠯᠪᠠᠭᠠᠯᠠᠨ ᠲᠤᠰᠬᠠᠢ ᠭᠡᠷᠡᠭᠯᠡᠭᠡ ᠪᠤᠯᠬᠤ ᠵᠤᠳᠤᠭ ᠢ ᠦᠢᠯᠡᠳᠤᠨ | ᠠᠰᠢᠭᠯᠠᠵᠤ ᠡᠬᠢᠯᠡᠭᠰᠡᠨ ᠲᠦᠯᠦᠪ ᠲᠠᠢ᠃ ᠲᠠᠷᠤᠢ ᠡᠷᠳᠡᠨ ᠤ ᠬᠦᠮᠦᠰ ︵ᠦᠨᠳᠦᠷᠯᠢᠭ ᠤᠨ ᠮᠤᠩᠭᠤᠯᠴᠤᠳ︶ | ᠪᠦᠰᠡ ᠪᠠᠨ ᠮᠦᠷᠦᠪᠴᠢᠯᠡᠨ ᠪᠦᠰᠡᠯᠡᠵᠤ ᠳᠡᠭᠦᠨ ᠠᠴᠠ ᠪᠠᠨ ᠪᠠᠷᠢᠴᠠ ᠭᠠᠷᠭᠠᠨ ᠪᠠᠷᠢᠯᠳᠤᠵᠤ ᠪᠠᠶᠢᠭᠰᠠᠨ ᠤ ᠤᠯᠪᠠᠭᠠ | ᠡᠳᠤᠭᠡ ᠴᠤ ᠦᠪᠤᠷ ᠮᠤᠩᠭᠤᠯ ᠳᠤ ᠬᠠᠷᠠᠭᠳᠠᠳᠠᠭ᠃ ᠡᠶᠢᠮᠤ ᠠᠴᠠ ᠪᠦᠰᠡ ᠨᠢ ᠵᠤᠳᠤᠭ ᠤᠨ ᠡᠪᠦᠭᠡ ᠭᠡᠯᠪᠡᠷᠢ | ᠪᠤᠯᠤᠨᠠ᠃ ᠵᠤᠳᠤᠭ ᠤᠨ ᠦᠨᠳᠦᠰᠦᠨ ᠬᠡᠷᠡᠭᠯᠡᠭᠡ ᠪᠤᠯ ᠪᠠᠷᠢᠴᠠ ᠪᠠᠷᠢᠬᠤ ᠳᠤ ᠠᠰᠢᠭᠯᠠᠭᠳᠠᠳᠠᠭ᠃ ᠬᠤᠶᠠᠷ | ᠬᠦᠮᠦᠨ ᠪᠠᠷᠢᠯᠳᠤᠬᠤ ᠦᠶᠡ ᠳᠤ ᠡᠷᠭᠡᠪᠰᠢ ᠪᠠᠷᠢᠴᠠᠨ ᠳᠤ ᠭᠦᠷᠴᠤ ᠰᠢᠢᠳᠤᠯ ᠬᠢᠨᠡ᠃ ᠡᠶᠢᠮᠤ ᠠᠴᠠ ᠪᠦᠭᠡ ᠶᠢᠨ | ᠪᠠᠷᠢᠴᠠ ᠤᠯᠬᠤ ᠳᠤ ᠵᠣᠷᠢᠯᠭᠠ ᠲᠠᠢ ᠵᠤᠳᠤᠭ ᠪᠤᠢ ᠪᠤᠯᠤᠭᠰᠠᠨ ᠪᠡ ᠳᠡᠭᠦᠨ ᠤ ᠰᠢᠨᠡᠴᠢᠯᠡᠯᠳᠡ ᠨᠢ ᠪᠠᠷᠢᠴᠠ ᠶᠢᠨ | ᠮᠡᠷᠭᠡᠵᠢᠯ᠂ ᠤᠨᠤᠯ ᠢ ᠲᠠᠭᠠᠵᠤ ᠬᠤᠪᠢᠷᠠᠭᠰᠠᠨ ᠭᠡᠵᠤ ᠪᠢ ᠦᠵᠡᠳᠡᠭ᠃ ᠪᠠᠰᠠ ᠪᠡᠶᠡ ᠶᠢᠨ ᠬᠠᠮᠠᠭᠠᠯᠠᠯᠳᠠ ᠶᠢᠨ | ᠡᠭᠦᠷᠭᠡ ᠴᠤ ᠳᠡᠭᠦᠨ ᠳᠤ ᠪᠠᠶᠢᠳᠠᠭ᠃ ᠡᠶᠢᠮᠤ ᠤᠳᠬᠠ ᠪᠠᠷ ᠢᠶᠠᠨ ᠦᠪᠤᠷ ᠮᠤᠩᠭᠤᠯ ᠵᠤᠳᠤᠭ ᠲᠤ ᠳᠤᠪᠤᠷᠤᠤ ᠲᠠᠢ | ᠪᠤᠯᠤᠭᠰᠠᠨ ᠭᠡᠭᠦ ᠦᠵᠡᠯᠳᠡ ᠤᠷᠤᠰᠢᠳᠠᠭ᠃ ᠠᠷᠠᠳ ᠤᠨ ᠠᠮᠠᠨ ᠶᠠᠷᠢᠶᠠᠨ ᠳᠤ ︽ᠵᠤᠳᠤᠪᠠᠯ ᠵᠤᠳᠤᠭ︕ ᠭᠡᠵᠤ | ᠵᠤᠳᠤᠭ ᠡᠮᠦᠰᠦᠭᠰᠡᠨ︾ ᠭᠡᠭᠦ ᠦᠯᠢᠭᠡᠷ ᠪᠠᠶᠢᠳᠠᠭ᠃ ᠡᠨᠡ ᠨᠢ ᠳᠡᠭᠦᠨ ᠤ ᠨᠡᠷᠡ ᠶᠢᠨ ᠢᠷᠡᠯᠳᠡ ᠴᠤ ᠪᠠᠶᠢᠵᠤ | ᠮᠡᠳᠡᠨᠡ᠃ | ᠮᠤᠩᠭᠤᠯ ᠪᠦᠭᠡ ᠶᠢᠨ ᠵᠤᠳᠤᠭ ᠢ ᠪᠦᠳᠦᠭᠡᠭᠦ ᠳᠤ ᠰᠠᠶᠢᠨ ᠰᠢᠷᠢ᠂ ᠮᠦᠩᠭᠦᠨ ᠳᠤᠪᠤᠷᠤᠤ᠂ ᠮᠢᠨᠳᠠᠰᠤᠨ | ᠤᠳᠠᠰᠤ᠂ ᠦᠩᠭᠡ ᠪᠦᠭᠦᠢ ᠰᠠᠷᠢᠰᠤ᠂ ᠪᠡᠷᠵᠡᠶᠢᠬᠢ ᠵᠡᠷᠭᠡ ᠱᠠᠭᠠᠷᠳᠠᠭᠳᠠᠳᠠᠭ᠃ ᠡᠳᠡᠭᠡᠷ ᠮᠠᠰᠢ ᠴᠢᠨᠠᠷᠯᠢᠭ ᠮᠡᠲ᠋ᠧᠷᠢᠶᠠᠯ | ᠤᠨ ᠠᠰᠢᠭᠯᠠᠯᠳᠠ ᠠᠴᠠ ᠰᠠᠶ᠋ᠢ ᠰᠠᠶᠢᠨ ᠵᠤᠳᠤᠭ ᠪᠤᠢ ᠪᠤᠯᠤᠨᠠ᠃ ᠮᠤᠩᠭᠤᠯ ᠪᠦᠭᠡ ᠶᠢᠨ ᠵᠤᠳᠤᠭ ᠨᠢ ᠬᠠᠷᠠ ᠪᠠᠷ | ᠦᠩᠭᠡᠯᠡᠭᠰᠡᠨ ᠰᠢᠷᠢ ᠪᠠᠷ ᠭᠤᠤᠯ ᠪᠤᠯᠭᠠᠳᠠᠭ ᠴᠤ ᠵᠠᠷᠢᠮ ᠦᠶᠡ ᠳᠤ ᠳᠤᠷᠠᠰᠢᠯ ᠰᠤᠨᠢᠷᠬᠠᠯ ᠠᠴᠠ ᠪᠠᠨ ᠪᠤᠯᠵᠤ | ᠤᠯᠠᠪᠠᠷ ᠦᠩᠭᠡ ᠪᠤᠶᠤ ᠰᠢᠷᠠᠩᠭᠤᠢ ᠦᠩᠭᠡ ᠲᠠᠢ ᠰᠢᠷᠢ ᠪᠠᠷ ᠴᠤ ᠬᠢᠭᠰᠡᠨ ᠬᠠᠷᠠᠭᠳᠠᠳᠠᠭ᠃ ᠬᠠᠯᠬᠠ ᠪᠦᠭᠡ ᠶᠢᠨ | ᠪᠦᠰ ᠵᠤᠳᠤᠭ ᠳᠤ ᠤᠯᠠᠪᠠᠷ ᠶᠠᠭᠠᠨ᠂ ᠭᠦᠭᠡ ᠦᠩᠭᠡ ᠵᠡᠷᠭᠡ ᠶᠢ ᠭᠤᠤᠯᠲᠠᠢ ᠠᠰᠢᠭᠯᠠᠳᠠᠭ ᠪᠠᠶᠢᠨᠠ᠃ ᠵᠤᠳᠤᠭ ᠢ | ᠡᠰᠭᠡᠬᠦ ᠠᠴᠠ ᠠᠪᠤᠭᠠᠳ ᠤᠷᠠᠯᠠᠵᠤ ᠤᠶᠤᠬᠤ ᠭᠦᠷᠳᠡᠯᠡ ᠮᠤᠩᠭᠤᠯᠴᠤᠳ ᠤᠨ ᠦᠳᠡᠮᠡᠯ᠂ ᠰᠢᠷᠢᠮᠡᠯ᠂ ᠭᠦᠭᠡᠭᠡᠮᠡᠯ᠂ | ᠬᠠᠳᠬᠤᠮᠠᠯ᠂ ᠵᠦᠰᠦᠮᠡᠯ ᠵᠡᠷᠭᠡ ᠤᠷᠠᠯᠢᠭ ᠤᠨ ᠤᠷᠠ ᠶᠢᠨ ᠰᠠᠩ ᠢ ᠰᠢᠩᠭᠡᠭᠰᠡᠨ ᠠᠴᠠ ᠵᠤᠳᠤᠭ ᠨᠢ ᠨᠢᠭᠡ ᠤᠳᠬᠠ | ᠪᠠᠷ ᠢᠶᠠᠨ ᠮᠤᠩᠭᠤᠯ ᠤᠷᠠᠯᠢᠭ ᠤᠨ ᠤᠬᠢ ᠰᠢᠯᠢᠳᠡᠭ ᠪᠦᠳᠦᠭᠡᠭᠳᠡᠭᠦᠨ ᠪᠤᠯᠤᠭᠰᠠᠨ ᠪᠠᠶᠢᠳᠠᠭ᠃ | ᠮᠤᠩᠭᠤᠯᠴᠤᠳ ᠵᠤᠳᠤᠭ ᠭᠡᠷᠡᠭᠯᠡᠭᠦ ᠪᠤᠯᠤᠭᠰᠠᠨ ᠠᠴᠠ ᠠᠪᠤᠭᠠᠳ ᠡᠳᠤᠭᠡ ᠭᠦᠷᠳᠡᠯᠡ ᠵᠤᠳᠤᠭ ᠲᠤ ᠨᠡᠯᠢᠶᠡᠳ | ᠬᠤᠪᠢᠷᠠᠯᠳᠠ ᠭᠠᠷᠤᠭᠰᠠᠨ ᠪᠠᠶᠢᠳᠠᠭ᠃ ᠶᠡᠷᠤᠩᠬᠢ ᠳᠠᠭᠠᠨ ᠡᠮᠦᠰᠭᠡᠯ ᠤᠨ ᠭᠡᠯᠪᠡᠷᠢ ᠲᠠᠢ ᠪᠠᠶᠢᠭᠰᠠᠨ ᠠᠴᠠ ᠪᠠᠨ | ᠲᠤᠰᠬᠠᠢ ᠮᠡᠷᠭᠡᠵᠢᠯ ᠤᠨ ᠠᠵᠢᠯ ᠤᠨ ᠭᠡᠷᠡᠭᠴᠡᠭᠡ ᠤᠷᠤᠭᠤ ᠢᠳᠡᠭ ᠢᠳᠡᠭ ᠢᠶᠠᠷ ᠰᠢᠯᠵᠢᠭᠰᠡᠨ ᠪᠠᠶᠢᠨᠠ᠃ ᠶᠡᠭᠡ | ᠡᠷᠳᠡᠨ ᠤ ᠵᠤᠳᠤᠭ ᠨᠢ ᠤᠤᠯ ᠨᠢ ᠪᠢᠳᠡᠭᠦᠤ ᠡᠩᠭᠡᠷ ᠲᠠᠢ ᠪᠠᠶᠢᠭᠰᠠᠨ ᠨᠢ ᠡᠳᠤᠭᠡ ᠶᠢᠨ ᠳᠡᠤᠭᠡᠨ ᠳᠤ ᠦᠯᠡᠳᠡᠵᠤ | ᠬᠤᠴᠤᠷᠤᠭᠰᠠᠨ ᠪᠠᠶᠢᠳᠠᠭ᠃ ᠳᠡᠭᠡᠭᠡᠳ ᠵᠠᠳᠠᠭᠠᠢ ᠡᠩᠭᠡᠷ ᠲᠠᠢ ᠪᠤᠯᠬᠤ ᠳᠤ ᠨᠢᠭᠡ ᠳᠡᠤᠭᠡᠨ ᠦᠯᠢᠭᠡᠷ ᠪᠠᠶᠢᠳᠠᠭ᠃ | ᠡᠷᠳᠡ ᠤᠷᠢᠳᠤ ᠶᠢᠨ ᠴᠠᠭ ᠲᠤ ᠨᠢᠭᠡ ᠮᠠᠰᠢ ᠬᠦᠴᠦ ᠴᠢᠳᠠᠯ ᠲᠠᠢ ᠪᠦᠰᠡᠭᠦᠢ ᠬᠦᠮᠦᠨ ᠨᠠᠶᠢᠷ ᠲᠤ ᠡᠷᠡᠴᠤᠳ ᠲᠠᠢ | ᠪᠠᠷᠢᠯᠳᠤᠬᠤ ᠶᠢ ᠰᠠᠨᠠᠵᠤ ᠦᠰᠦ ᠳᠤᠯᠤᠭᠠᠢ ᠪᠠᠨ ᠡᠷᠡᠭᠲᠡᠢ ᠪᠠᠷ ᠶᠠᠩᠵᠤᠯᠠᠵᠤ ᠠᠪᠤᠭᠠᠳ ᠨᠠᠶᠢᠷ ᠲᠤ ᠪᠠᠷᠢᠯᠳᠤᠨ | ᠲᠡᠷᠢᠭᠦᠯᠡᠭᠰᠡᠨ ᠪᠠᠶᠢᠨᠠ᠃ ᠳᠡᠭᠡᠭᠡᠳ ᠬᠦᠮᠦᠰ ᠳᠡᠭᠦᠨ ᠢ ᠡᠮᠡᠭᠲᠡᠢ ᠭᠦᠮᠦᠨ ᠭᠡᠳᠡᠭ ᠢ ᠨᠢ ᠮᠡᠳᠡᠭᠰᠡᠨ ᠠᠴᠠ ᠬᠤᠶᠢᠰᠢ | ᠵᠤᠳᠤᠭ ᠤᠨ ᠡᠩᠭᠡᠷ ᠢ ᠵᠠᠳᠠᠭᠠᠢ ᠪᠤᠯᠭᠠᠭᠰᠠᠨ ᠭᠡᠳᠡᠭ᠃ ᠶᠡᠷᠦ ᠨᠢ ᠪᠢᠳᠡᠭᠦᠤ ᠡᠩᠭᠡᠷ ᠲᠠᠢ ᠵᠤᠳᠤᠭ ᠢ ᠨᠢᠭᠡ ᠯᠡ | ᠳᠡᠭᠡᠷᠡ ᠵᠠᠳᠠᠭᠠᠢ ᠪᠤᠯᠭᠠᠭᠰᠠᠨ ᠪᠢᠰᠢ ᠭᠡᠳᠡᠭ ᠢ ᠳᠡᠤᠭᠡᠨ ᠵᠢᠷᠤᠭ ᠰᠡᠭᠦᠳᠡᠷ ᠠᠴᠠ ᠳᠤᠳᠤ ᠬᠠᠷᠠᠵᠤ ᠪᠤᠯᠤᠨᠠ᠃ | ᠵᠤᠳᠤᠭ ᠵᠠᠳᠠᠭᠠᠢ ᠡᠩᠭᠡᠷ ᠲᠠᠢ ᠪᠤᠯᠬᠤ ᠳᠤ ᠪᠠᠰᠠ ᠭᠤᠷᠪᠡᠨ ᠱᠠᠳᠤ ᠦᠶᠡ ᠶᠢ ᠦᠩᠭᠡᠷᠡᠭᠡᠭᠰᠡᠨ ᠪᠠᠶᠢᠳᠠᠭ᠃ | ᠳᠤᠬᠠᠶᠢᠯᠠᠪᠠᠯ ᠬᠦᠷᠮᠡᠴᠢᠯᠡᠭᠰᠡᠨ ᠵᠠᠳᠠᠭᠠᠢ ᠡᠩᠭᠡᠷ᠂ ᠵᠢᠵᠢᠭ ᠭᠤᠷᠪᠠᠯᠵᠢᠯᠠᠭᠰᠠᠨ ᠵᠠᠳᠠᠭᠠᠢ ᠡᠩᠭᠡᠷ᠂ ᠨᠡᠯᠢᠶᠡᠳ | ᠲᠠᠯᠪᠢᠭᠤ ᠭᠤᠷᠪᠡᠯᠵᠢᠯᠠᠭᠰᠠᠨ ᠵᠠᠳᠠᠭᠠᠢ ᠡᠩᠭᠡᠷ ᠵᠡᠷᠭᠡ ᠪᠠᠷ ᠭᠦᠭᠵᠢᠭᠰᠡᠨ ᠳᠡᠤᠭᠡ ᠪᠢᠳᠡᠨ ᠳᠤ ᠪᠠᠶᠢᠳᠠᠭ᠃ ᠳᠡᠭᠡᠭᠡᠳ | ᠤᠳᠤ ᠶᠢᠨ ᠪᠠᠶᠢᠳᠠᠯ ᠳᠤ ᠰᠢᠯᠵᠢᠬᠦ ᠳᠤ ᠳᠤᠩ ᠤᠷᠳᠤ ᠬᠤᠭᠤᠴᠠᠭᠠ ᠦᠩᠭᠡᠷᠡᠭᠰᠡᠨ ᠨᠢ ᠳᠤᠳᠤᠷᠬᠠᠢ᠃ ᠲᠠᠷᠤᠢ | ᠪᠢᠳᠡᠭᠦᠤ ᠡᠩᠭᠡᠷ ᠲᠠᠢ ᠪᠠᠶᠢᠭᠰᠠᠨ ᠠᠴᠠ ᠪᠠᠨ ᠨᠡᠩ ᠰᠠᠶᠢᠨ ᠪᠠᠷᠢᠴᠠ ᠤᠯᠵᠤ ᠪᠤᠯᠬᠤᠶᠢᠴᠠ ᠭᠡᠯᠪᠡᠷᠢ ᠪᠠᠷ ᠡᠩᠭᠡᠷ ᠨᠢ | ᠬᠤᠪᠢᠷᠠᠵᠤ ᠪᠦᠰᠡ ᠪᠤᠶᠤ ᠬᠠᠨᠴᠤᠢ᠂ ᠰᠡᠨᠵᠢ ᠪᠠᠷ ᠭᠤᠤᠯ ᠪᠤᠯᠭᠠᠭᠰᠠᠨ ᠭᠡᠯᠪᠡᠷᠢ ᠳᠤ ᠰᠢᠯᠵᠢᠭᠰᠡᠨ ᠪᠠᠶᠢᠳᠠᠭ᠃ ᠡᠨᠡ | ᠨᠢ ᠤᠷᠳᠤ ᠤᠳᠠᠭᠠᠨ ᠤ ᠬᠡᠷᠡᠭᠯᠡᠭᠡ ᠪᠠᠷ ᠲᠠᠮᠵᠢᠨ ᠰᠠᠶᠢᠵᠢᠷᠠᠨ ᠰᠢᠨᠡᠴᠢᠯᠡᠭᠳᠡᠭᠰᠡᠨ ᠪᠠᠶᠢᠳᠠᠯ ᠪᠤᠯᠤᠨᠠ᠃ ᠵᠤᠳᠤᠭ ᠤᠨ | ᠭᠡᠯᠪᠡᠷᠢ ᠪᠠᠶᠢᠳᠠᠯ ᠤᠨ ᠬᠤᠪᠢᠷᠠᠯ ᠨᠢ ᠪᠢᠳᠡᠭᠦᠤ ᠡᠩᠭᠡᠷ ᠲᠠᠢ ᠵᠤᠳᠤᠭ᠂ ᠵᠠᠳᠠᠭᠠᠢ ᠡᠩᠭᠡᠷ ᠲᠠᠢ ᠵᠤᠳᠤᠭ᠂ ᠡᠷᠪᠡᠭᠡᠢ | ᠵᠤᠳᠤᠭ᠂ ᠬᠠᠯᠬᠠ ᠵᠤᠳᠤᠭ ᠵᠡᠷᠭᠡ ᠭᠡᠳᠤᠨ ᠵᠦᠢᠯ ᠤᠨ ᠬᠡᠯᠪᠡᠷᠢ ᠶᠢ ᠥᠩᠭᠡᠷᠡᠭᠡᠭᠰᠡᠨ ᠪᠠᠶᠢᠳᠠᠭ᠃ ᠤᠳᠤ ᠶᠢᠨ | ᠬᠤᠪᠢ ᠳᠤ ᠡᠷᠪᠡᠭᠡᠢ ᠵᠤᠳᠤᠭ ᠪᠤᠯᠤᠨ ᠬᠠᠯᠬᠠ ᠵᠤᠳᠤᠭ ᠤᠨ ᠭᠡᠯᠪᠡᠷᠢ ᠬᠤᠶᠠᠷ ᠪᠦᠰᠡ ᠨᠤᠳᠤᠭ ᠲᠤ ᠲᠦᠯᠦᠪᠰᠢᠷᠡᠨ | ᠦᠯᠡᠳᠡᠵᠡᠢ᠃ ᠪᠠᠷᠭᠤ ᠪᠤᠷᠢᠶᠠᠳ ᠶᠠᠰᠤᠲᠠᠨ ᠤ ᠪᠦᠭᠡ ᠶᠢᠨ ᠵᠤᠳᠤᠭ ᠨᠢ ᠭᠡᠳᠤᠶᠢᠪᠡᠷ ᠡᠷᠪᠡᠬᠡᠢ ᠵᠤᠳᠤᠭ ᠲᠤ | ᠪᠠᠭᠳᠠᠳᠠᠭ ᠪᠠᠶᠢᠯᠠ ᠭᠡᠰᠡᠨ ᠴᠤ ᠨᠡᠯᠢᠶᠡᠳ ᠲᠠᠯᠠ ᠳᠤ ᠨᠡᠶᠢᠳᠡ ᠮᠤᠩᠭᠤᠯ ᠤᠨ ᠰᠢᠷᠢᠨ ᠵᠤᠳᠤᠭ ᠲᠠᠢ ᠪᠠᠰᠠ ᠠᠳᠠᠯᠢ | ᠦᠭᠡᠢ ᠲᠠᠯᠠ ᠤᠷᠤᠰᠢᠳᠠᠭ᠃ ᠵᠢᠱᠢᠶᠡ ᠨᠢ ᠵᠤᠳᠤᠭ ᠤᠨ ᠬᠤᠷᠮᠤᠢ᠂ ᠪᠦᠰᠡ ᠨᠡᠯᠢᠶᠡᠳ ᠠᠳᠠᠯᠢ ᠦᠭᠡᠢ ᠪᠠᠶᠢᠳᠠᠭ᠃ | ᠪᠠᠷᠭᠤ ᠪᠤᠷᠢᠶᠠᠳ ᠶᠠᠰᠤᠳᠠᠨ ᠤ ᠡᠮᠦᠰᠳᠡᠭ ᠵᠤᠳᠤᠭ ᠤᠨ ᠬᠤᠷᠮᠤᠢ ᠶᠢᠨ ᠦᠵᠦᠭᠦᠷ ᠪᠠᠶᠢᠳᠠᠭ ᠦᠭᠡᠢ᠃ ᠡᠨᠡ ᠲᠠᠯᠠ | ᠨᠢ ᠬᠠᠯᠬᠠ ᠵᠤᠳᠤᠭ ᠲᠠᠢ ᠨᠡᠯᠢᠶᠡᠳ ᠲᠦᠰᠦᠭᠡᠷᠭᠡᠤ ᠪᠠᠶᠢᠳᠠᠭ ᠪᠦᠭᠡᠳ ᠦᠩᠭᠡ ᠶᠢᠨ ᠪᠦᠰ ᠢᠶᠠᠷ ᠲᠠᠷᠤᠭᠤᠯᠵᠤ | ᠪᠦᠰᠡᠯᠡᠳᠡᠭ ᠵᠢᠷᠤᠮ ᠰᠠᠶ᠋ᠢᠬᠠᠨ ᠪᠤᠯᠳᠠᠯᠠ ᠤᠯᠠᠮᠵᠢᠯᠠᠬᠳᠠᠵᠤ ᠪᠠᠶᠢᠵᠠᠢ᠃ ᠡᠶᠢᠮᠤᠷᠭᠦ ᠤᠳᠬᠠ ᠰᠢᠨᠵᠢ ᠪᠠᠷ ᠢᠶᠠᠨ | ᠪᠠᠷᠭᠤ ᠪᠤᠷᠢᠶᠠᠳ ᠶᠠᠰᠤᠳᠠᠨ ᠤ ᠪᠦᠭᠡ ᠨᠢ ᠮᠤᠩᠭᠤᠯ ᠪᠦᠭᠡ ᠪᠤᠯᠤᠨ ᠬᠠᠯᠬᠠ ᠪᠦᠭᠡ ᠶᠢᠨ ᠬᠤᠶᠠᠷᠳᠠᠮᠠᠯ ᠰᠢᠨᠵᠢ ᠶᠢ | ᠬᠠᠳᠠᠭᠠᠯᠠᠭᠰᠠᠨ ᠤᠨᠴᠠᠯᠢᠭ ᠲᠠᠢ ᠮᠤᠩᠭᠤᠯ ᠪᠦᠭᠡ ᠶᠢᠨ ᠨᠢᠭᠡ ᠲᠦᠷᠦᠯ ᠶᠤᠮ᠃ ᠤᠳᠤ ᠪᠤᠯ ᠮᠤᠩᠭᠤᠯ ᠪᠦᠭᠡ ᠶᠢᠨ | ᠡᠷᠪᠡᠭᠡᠢ ᠵᠤᠳᠤᠭ ᠲᠠᠢ ᠮᠠᠰᠢ ᠢᠵᠢᠯᠰᠢᠵᠤ ᠪᠠᠶᠢᠭᠠ ᠬᠠᠷᠠᠭᠳᠠᠳᠠᠭ᠃ ᠮᠤᠩᠭᠤᠯ ᠪᠦᠭᠡ ᠶᠢᠨ ᠵᠤᠳᠤᠭ ᠴᠤ ᠰᠠᠶ᠋ᠢᠬᠠᠨ | ᠪᠤᠯᠳᠠᠯᠠ ᠪᠦᠰᠡ ᠪᠠᠷ ᠲᠠᠷᠤᠭᠤᠯᠵᠤ ᠪᠦᠰᠡᠯᠡᠭᠦ ᠭᠡᠯᠪᠡᠷᠢ ᠪᠠᠨ ᠬᠠᠳᠠᠭᠠᠯᠠᠵᠤ ᠪᠠᠶᠢᠭᠰᠠᠨ ᠶᠤᠮ᠃ | ᠮᠤᠩᠭᠤᠯ ᠪᠦᠭᠡ ᠶᠢᠨ ᠵᠤᠳᠤᠭ ᠢ ᠴᠢᠮᠡᠭᠯᠡᠯ ᠢᠶᠠᠷ ᠨᠢ ᠳᠤᠪᠤᠷᠤᠤ ᠲᠠᠢ ᠵᠤᠳᠤᠭ ᠪᠤᠶᠤ ᠳᠤᠪᠤᠷᠤᠤ ᠦᠭᠡᠢ | ᠵᠤᠳᠤᠭ ᠭᠡᠵᠤ ᠠᠩᠬᠢᠯᠠᠳᠠᠭ᠃ ᠮᠤᠩᠭᠤᠯ ᠪᠦᠭᠡ ᠶᠢᠨ ᠵᠤᠳᠤᠭ ᠤᠨ ᠳᠤᠪᠤᠷᠤᠤ ᠶᠢ ᠶᠡᠷᠦ ᠨᠢ 128᠂ 256᠂ | 512 ᠵᠡᠷᠭᠡ ᠪᠠᠷ ᠳᠤᠭᠳᠠᠭᠠᠵᠤ ᠪᠦᠭᠡ ᠶᠢᠨ ᠨᠤᠭᠤᠯᠤᠭᠠᠨ ᠤ ᠳᠤᠭᠠ ᠪᠠᠷ ᠠᠰᠢᠭᠯᠠᠳᠠᠭ᠃ ᠵᠠᠭᠤ ᠬᠤᠷᠢᠨ ᠨᠠᠢᠮᠠᠨ | ᠳᠤᠪᠤᠷᠤᠤ ᠲᠠᠢ ᠵᠤᠳᠤᠭ ᠤᠨ ᠳᠤᠪᠤᠷᠤᠤ ᠨᠢ ᠨᠡᠯᠢᠶᠡᠳ ᠳᠤᠮᠤ ᠪᠠᠶᠢᠳᠠᠭ ᠪᠤᠯ ᠲᠠᠪᠤᠨ ᠵᠠᠭᠤ ᠠᠷᠪᠠᠨ ᠬᠤᠶᠠᠷ | ᠳᠤᠪᠤᠷᠤᠤ ᠲᠠᠢ ᠵᠤᠳᠤᠭ ᠤᠨ ᠳᠤᠪᠤᠷᠤᠤ ᠨᠢ ᠮᠠᠰᠢ ᠵᠢᠵᠢᠭ ᠪᠠᠶᠢᠳᠠᠭ᠃ ᠪᠠᠰᠠ ᠭᠤᠷᠪᠡᠨ ᠵᠠᠭᠤ ᠭᠤᠴᠢᠨ ᠭᠤᠷᠪᠠᠨ | ᠳᠤᠪᠤᠷᠤᠤ ᠲᠠᠢ ᠵᠤᠳᠤᠭ ᠪᠠᠶᠢᠳᠠᠭ ᠭᠡᠵᠤ ᠵᠤᠳᠤᠭ ᠤᠨ ᠦᠨᠳᠦᠰᠦᠨ ᠦᠪᠯᠡᠭᠴᠢ ᠠᠯᠳᠠᠨᠪᠤᠯᠤᠳ ᠬᠠᠭᠤᠴᠢᠯᠠᠵᠤ | ᠪᠠᠶᠢᠯᠠ᠃ ᠭᠡᠳᠡᠯᠡ ᠡᠭᠦᠨ ᠤ ᠳᠤᠳᠤᠷᠬᠠᠢ ᠤᠳᠬᠠ ᠤᠴᠢᠷ ᠢ ᠨᠡᠭᠡᠭᠡᠭᠦ ᠪᠤᠯᠤᠮᠵᠢ ᠬᠠᠷᠠᠬᠠᠨ ᠪᠦᠷᠢᠯᠳᠤᠭᠡ ᠦᠭᠡᠢ | ᠪᠠᠶᠢᠭᠰᠠᠭᠠᠷ᠃ ᠳᠤᠪᠤᠷᠤᠤ ᠶᠢ ᠤᠤᠯ ᠨᠢ ᠮᠦᠩᠬᠦ ᠪᠠᠷ ᠭᠤᠤᠯᠲᠠᠢ ᠬᠢᠵᠤ ᠪᠠᠰᠠ ᠠᠯᠳᠠᠨ ᠳᠤᠪᠤᠷᠤᠤ ᠪᠠᠶᠢᠯᠠ ᠬᠡᠭᠦ | ᠬᠠᠭᠤᠴᠢ ᠴᠤ ᠪᠠᠶᠢᠳᠠᠭ᠃ ︽ᠠᠯᠳᠠᠨ ᠮᠦᠩᠭᠦᠨ ᠳᠤᠪᠤᠷᠤᠤ ᠨᠢ ᠠᠷᠤ ᠨᠢᠷᠤᠭᠤᠨ ᠳᠤ ᠨᠢ ᠬᠢᠯᠠᠯᠵᠠᠭᠠᠳ᠂᠂᠂᠂︾ | ᠭᠡᠳᠡᠭ ᠲᠠᠭᠤᠤ ᠠᠴᠠ ᠦᠵᠡᠭᠦ ᠳᠤ ᠮᠤᠩᠭᠤᠯᠴᠤᠳ ᠠᠯᠳᠠᠨ ᠳᠤᠪᠤᠷᠤ ᠲᠠᠢ ᠵᠤᠳᠤᠭ ᠡᠳ᠋ᠯᠡᠵᠤ ᠪᠠᠶᠢᠭᠰᠠᠨ ᠪᠠᠶᠢᠵᠤ | ᠪᠤᠯᠤᠨᠠ᠃ ᠤᠳᠤ ᠳᠤᠪᠤᠷᠤᠤ ᠶᠢᠨ ᠬᠤᠪᠢ ᠳᠤ ︽ᠴᠠᠭᠠᠨ ᠭᠠᠤᠯᠢ︾ ᠭᠡᠳᠡᠭ ᠮᠡᠲ᠋ᠧᠷᠢᠶᠠᠯ ᠢᠶᠠᠷ ᠭᠤᠤᠯᠲᠠᠢ ᠬᠢᠳᠡᠭ | ᠪᠤᠯᠤᠭᠰᠠᠨ ᠪᠠᠶᠢᠨᠠ᠃ | ᠠᠰᠢᠭᠯᠠᠭᠰᠠᠨ ᠮᠡᠲ᠋ᠧᠷᠢᠶᠠᠯ ᠢᠶᠠᠷ ᠨᠢ ᠪᠦᠰ ᠵᠤᠳᠤᠭ ᠪᠤᠶᠤ ᠰᠢᠷᠢᠨ ᠵᠤᠳᠤᠭ ᠭᠡᠵᠤ ᠠᠩᠬᠢᠯᠠᠨᠠ᠃ ᠡᠷᠪᠡᠭᠡᠢ | ᠵᠤᠳᠤᠭ ᠢ ᠪᠠᠰᠠ ︽ᠰᠢᠷᠢᠨ ᠵᠤᠳᠤᠭ︾ ᠭᠡᠵᠤ ᠴᠤ ᠨᠡᠷᠡᠯᠡᠳᠡᠭ᠃ ᠲᠡᠷᠡ ᠨᠢ ᠦᠭᠡᠷ ᠤᠨ ᠰᠠᠶᠢᠨ ᠰᠢᠷᠢ ᠪᠠᠷ | ᠦᠢᠯᠡᠳᠳᠡᠭ ᠤᠨ ᠤᠴᠢᠷ ᠲᠡᠶᠢᠮᠤ ᠨᠡᠷᠡ ᠲᠠᠢ ᠪᠤᠯᠤᠭᠰᠠᠨ ᠪᠠᠶᠢᠳᠠᠭ᠃ ᠰᠢᠷᠢᠨ ᠵᠤᠳᠤᠭ ᠨᠢ ᠰᠢᠯᠢ ᠶᠢᠨ ᠭᠤᠤᠯ | ᠢᠶᠠᠷ ᠲᠦᠪᠯᠡᠭᠰᠡᠨ ᠤᠷᠤᠨ ᠪᠦᠰᠨ ᠪᠠᠷ ᠨᠡᠶᠢᠳᠡᠮ ᠠᠰᠢᠬᠯᠠᠳᠠᠭ ᠪᠤᠯᠬᠤᠷ ︽ᠰᠢᠯᠢ ᠶᠢᠨ ᠭᠤᠤᠯ ᠤᠨ ᠰᠢᠷᠢᠨ | ᠵᠤᠳᠤᠭᠳᠠᠨ︾ ᠭᠡᠰᠡᠨ ᠰᠠᠶᠢᠬᠠᠨ ᠠᠯᠲᠠᠷ ᠲᠠᠢ ᠪᠤᠯᠤᠭᠰᠠᠨ ᠪᠠᠶᠢᠳᠠᠭ᠃ ᠬᠠᠯᠬᠠ ᠵᠤᠳᠤᠭ ᠨᠢ ᠪᠦᠰ᠂ ᠮᠢᠨᠳᠠᠰᠤ | ᠵᠡᠷᠭᠡ ᠪᠠᠷ ᠤᠷᠠᠯᠠᠵᠤ ᠪᠦᠳᠦᠭᠡᠭᠰᠡᠨ ᠪᠤᠯᠬᠤᠷ ᠪᠢᠳᠡ ᠳᠡᠭᠦᠨ ᠢ ᠪᠦᠰ ᠵᠤᠳᠤᠭ ᠭᠡᠮᠡᠨ ᠨᠡᠷᠡᠯᠡᠳᠡᠭ᠃ ᠮᠤᠩᠭᠤᠯ ᠪᠦᠭᠡ | ᠶᠢᠨ ᠡᠷᠪᠡᠬᠡᠢ ᠵᠤᠳᠤᠭ ᠢ ᠳᠡᠭᠡᠷᠡ ᠦᠶᠡ ᠳᠤ ᠪᠠᠰᠠ ᠪᠦᠰ ᠢᠶᠠᠷ ᠬᠢᠵᠤ ᠪᠠᠶᠢᠭᠰᠠᠨ ᠳᠡᠮᠳᠡᠭᠯᠡᠯ ᠪᠠᠶᠢᠳᠠᠭ᠃ ᠦᠨᠦ | ᠦᠶᠡ ᠪᠤᠯᠤᠭᠠᠳ ᠪᠦᠷ ᠢᠵᠢᠯᠭᠡᠨ ᠲᠦᠪᠰᠢᠨ ᠳᠤ ᠰᠢᠷᠢ ᠪᠠᠷ ᠬᠢᠳᠡᠭ ᠪᠤᠯᠵᠠᠢ᠃ ᠬᠠᠯᠬᠠ ᠪᠦᠭᠡ ᠶᠢᠨ ᠵᠤᠳᠤᠭ ᠨᠢ | ᠪᠦᠰ ᠢᠶᠠᠷ ᠦᠢᠯᠡᠳᠦᠳᠡᠭ ᠪᠦᠭᠡᠳ ᠬᠠᠨᠴᠤᠢ ᠨᠢ ᠮᠠᠰᠢ ᠤᠷᠳᠤ ᠪᠠᠶᠢᠳᠠᠭ ᠪᠤᠯ ᠮᠤᠩᠭᠤᠯ ᠪᠦᠭᠡ ᠶᠢᠨ ᠡᠷᠪᠡᠭᠡᠢ | ᠵᠤᠳᠤᠭ ᠨᠢ ᠰᠢᠷᠢ ᠪᠠᠷ ᠬᠢᠵᠤ ᠬᠠᠨᠴᠤᠢ ᠨᠢ ᠳᠤᠩ ᠪᠠᠭᠠ ᠦᠯᠡᠳᠡᠭᠡᠭᠰᠡᠨ ᠪᠠᠶᠢᠳᠠᠭ᠃ ᠬᠤᠶᠠᠷ ᠪᠦᠰᠡ ᠨᠤᠳᠤᠭ | ᠤᠨ ᠵᠤᠳᠤᠭ ᠤᠨ ᠤᠴᠢᠷ ᠤᠳᠬᠠ ᠶᠢᠨ ᠬᠤᠪᠢ ᠳᠤ ᠢᠵᠢᠯᠭᠡᠨ ᠪᠠᠶᠢᠳᠠᠭ ᠴᠤ ᠬᠢᠵᠤ ᠪᠦᠳᠦᠭᠡᠭᠦ ᠰᠡᠳᠬᠢᠬᠦᠢ ᠶᠢᠨ | ᠬᠤᠪᠢ ᠳᠤ ᠦᠪᠤᠷ ᠮᠤᠩᠭᠤᠯ ᠨᠢ ᠤᠯᠠᠮᠵᠢᠯᠠᠯ ᠢ ᠭᠤᠤᠯᠴᠢᠯᠠᠵᠤ ᠠᠷᠤ ᠬᠠᠯᠬᠠ ᠨᠢ ᠰᠢᠨᠡᠴᠢᠯᠡᠯ ᠢ ᠭᠤᠤᠯᠴᠢᠯᠠᠵᠤ | ᠬᠤᠭᠤᠷᠤᠨᠳᠤ ᠪᠠᠨ ᠮᠠᠰᠢ ᠶᠡᠭᠡ ᠵᠦᠷᠢᠶᠡ ᠲᠠᠢ ᠪᠠᠶᠢᠳᠠᠭ᠃ | ᠵᠤᠳᠤᠭ ᠲᠤ ᠮᠠᠰᠢ ᠬᠦᠨ ᠪᠡᠯᠭᠡᠳᠡᠯ ᠤᠨ ᠰᠢᠨᠵᠢ ᠤᠷᠤᠰᠢᠳᠠᠭ᠃ ᠵᠤᠳᠤᠭ ᠲᠤ ᠳᠤᠪᠤᠷᠤᠤ ᠠᠰᠢᠭᠯᠠᠬᠤ | ᠭᠡᠳᠡᠭ ᠨᠢ ᠡᠷᠳᠡᠨ ᠤ ᠴᠡᠷᠢᠭ ᠵᠠᠩᠵᠤᠨ ᠤ ᠪᠡᠶᠡ ᠬᠠᠮᠠᠭᠠᠯᠠᠯᠳᠠ ᠶᠢᠨ ᠬᠤᠶᠠᠭ ᠳᠤᠭᠤᠯᠭᠠ ᠶᠢᠨ ᠦᠨᠳᠦᠰᠦᠨ | ᠤᠶᠢᠯᠠᠭᠠᠯᠳᠠ ᠠᠴᠠ ᠡᠶᠢᠮᠤ ᠰᠡᠳᠬᠢᠮᠵᠢ ᠢᠷᠡᠭᠰᠡᠨ ᠪᠤᠯᠤᠯᠲᠠᠢ ᠭᠡᠵᠤ ᠪᠢ ᠳᠦᠰᠦᠭᠡᠯᠡᠳᠡᠭ᠃ ᠡᠶᠢᠮᠤ ᠠᠴᠠ ᠡᠭᠦᠨ | ᠳᠤ ᠴᠡᠷᠢᠭ ᠡᠷᠡ ᠶᠢᠨ ᠡᠷᠡᠯᠭᠡᠭ ᠪᠠᠭᠠᠳᠤᠷᠯᠢᠭ ᠨᠤᠭᠤᠷᠠᠰᠢ ᠦᠭᠡᠢ ᠳᠡᠮᠡᠴᠡᠳᠡᠭ ᠵᠤᠷᠢᠭ ᠤᠨ ᠪᠡᠯᠭᠡᠳᠡᠯ ᠪᠤᠯᠵᠤ ᠤᠳᠤ | ᠴᠤ ᠮᠦᠨ ᠬᠤᠶᠠᠭ ᠳᠤᠭᠤᠯᠭᠠ ᠶᠢᠨ ᠭᠡᠯᠪᠡᠷᠢ ᠶᠢᠨ ᠤᠯᠠ ᠮᠦᠷ ᠢᠶᠠᠨ ᠬᠠᠳᠠᠭᠠᠯᠠᠭᠰᠠᠭᠠᠷ ᠪᠠᠶᠢᠳᠠᠭ᠃ ᠲᠠᠬᠢᠪᠠᠯ | ᠳᠡᠭᠦᠨ ᠤ ᠳᠤᠳᠤᠷᠬᠠᠢ ᠭᠡᠮᠵᠢᠶᠠᠨ ᠤ ᠪᠡᠯᠭᠡᠳᠡᠯ ᠵᠦᠢ ᠶᠢᠨ ᠠᠭᠤᠯᠬᠤᠨ ᠳᠤ ᠵᠤᠳᠤᠭ ᠤᠨ ︽ᠳᠤᠯᠢ︾ ᠤᠷᠤᠳᠠᠭ᠃ | ᠶᠡᠷᠤᠩᠬᠢ ᠳᠡᠭᠡᠨ ᠵᠤᠳᠤᠭ ᠤᠨ ᠳᠤᠯᠢ ᠶᠢ ᠡᠷᠳᠡ ᠦᠶᠡ ᠠᠴᠠ ᠡᠳᠤᠭᠡ ᠪᠤᠯᠳᠠᠯᠠ ᠲᠦᠷᠪᠡᠨ ᠭᠦᠴᠦᠳᠡᠨ ᠤ ᠵᠢᠷᠤᠭ | ᠢᠶᠠᠷ ᠭᠤᠤᠯ ᠪᠤᠯᠭᠠᠨ ᠵᠠᠷᠢᠮ ᠵᠤᠳᠤᠭ ᠲᠤ ᠪᠠᠰᠠ ᠨᠠᠷᠠ ᠰᠠᠷᠠ ᠭᠠᠯ ᠤᠨ ᠪᠡᠯᠭᠡᠳᠡᠯ ᠴᠤ ᠬᠠᠷᠠᠭᠳᠠᠳᠠᠭ᠃ ᠡᠳᠡᠭᠡᠷ | ᠵᠦᠢᠯ ᠢ ᠵᠤᠳᠤᠭ ᠤᠨ ᠳᠤᠯᠢ ᠪᠤᠯᠭᠠᠨ ᠬᠢᠵᠤ ᠮᠤᠩᠭᠤᠯᠴᠤᠳ ᠤᠨ ᠭᠦᠴᠦᠨ ᠳᠡᠭᠦᠰ ᠡᠷᠳᠡᠮ ᠤᠬᠠᠭᠠᠨᠲᠠᠢ ᠪᠠᠶᠢᠳᠠᠭ | ᠢ ᠪᠡᠯᠭᠡᠳᠡᠨ᠂ ᠨᠢᠴᠤᠵᠤ ᠪᠤᠴᠠᠰᠢ ᠦᠭᠡᠢ ᠡᠷᠡᠯᠭᠡᠭ ᠵᠤᠷᠢᠭ ᠰᠦᠰᠦ ᠶᠢ ᠬᠠᠷᠠᠭᠤᠯᠳᠠᠭ ᠪᠠᠶᠢᠨᠠ᠃ ᠡᠨᠡ ᠪᠤᠯ | ᠮᠤᠩᠭᠤᠯ ᠪᠦᠭᠡ ᠶᠢᠨ ᠵᠤᠳᠤᠭ ᠤᠨ ᠦᠪᠡᠷᠮᠢᠴᠡ ᠤᠨᠴᠠᠯᠢᠭ ᠰᠢᠨᠵᠢ ᠶᠢᠨ ᠨᠢᠭᠡ ᠲᠠᠯᠠ ᠪᠠᠶᠢᠭᠠ ᠶᠤᠮ᠃ ᠲᠦᠷᠪᠡᠨ | ᠭᠦᠴᠦᠳᠡᠨ ᠢᠶᠠᠷ ᠪᠡᠯᠭᠡᠳᠡᠯ ᠪᠤᠯᠭᠠᠵᠤ ᠪᠠᠶᠢᠨᠠ ᠭᠡᠳᠡᠭ ᠪᠤᠯ ᠳᠡᠤᠭᠡᠨ ᠤᠯᠠᠮᠵᠢᠯᠠᠯ ᠲᠠᠢ ᠬᠤᠯᠪᠤᠭᠠ ᠲᠠᠢ᠃ ᠦᠨᠢ | ᠡᠷᠳᠡ ᠠᠴᠠ ᠮᠤᠩᠭᠤᠯᠴᠤᠳ ᠲᠦᠷᠪᠡᠨ ᠬᠦᠴᠦᠳᠡᠨ ᠢ ᠰᠢᠳᠤᠵᠤ ᠳᠡᠭᠡᠳᠤᠯᠡᠵᠤ ᠳᠡᠭᠦᠨ ᠢ ᠠᠪᠳᠠᠷᠠ ᠬᠤᠷᠭᠤ᠂ | ᠶᠠᠭᠤ ᠨᠢᠭᠡ ᠳᠡᠭᠡᠷᠡ ᠪᠠᠨ ᠰᠡᠶᠢᠯᠵᠤ ᠮᠤᠩᠭᠤᠯᠴᠤᠳ ᠤᠨ ᠳᠤᠮᠳᠠ ᠪᠠᠶᠢᠯᠭᠠᠭᠰᠠᠭᠠᠷ ᠢᠷᠡᠭᠰᠡᠨ ᠨᠢ ᠮᠤᠩᠭᠤᠯᠴᠤᠳ | ᠤᠨ ᠪᠡᠯᠭᠡᠳᠡᠯ ᠵᠦᠢ ᠶᠢᠨ ᠤᠶᠢᠯᠠᠭᠠᠯᠳᠠ ᠲᠠᠨᠢᠯᠳᠠ ᠲᠠᠢ ᠬᠤᠯᠪᠤᠭᠠ ᠲᠠᠢ ᠶᠤᠮ᠃ ᠡᠨᠡᠭᠦ ᠤᠯᠠᠮᠵᠢᠯᠠᠯ ᠮᠤᠩᠭᠤᠯ | ᠪᠦᠭᠡ ᠶᠢᠨ ᠵᠤᠳᠤᠭ ᠲᠤ ᠪᠠᠰᠠ ᠦᠯᠡᠳᠡᠨ ᠬᠤᠴᠤᠷᠤᠭᠰᠠᠨ ᠨᠢ ᠨᠢᠭᠡ ᠭᠠᠶᠢᠬᠠᠮᠰᠢᠭ ᠶᠤᠮ᠃ ᠤᠳᠤ ᠦᠶᠡ | ᠭᠦᠷᠦᠭᠡᠳ ᠵᠠᠷᠢᠮ ᠪᠦᠭᠡᠴᠢᠳ ᠦᠪᠡᠷ ᠤᠨ ᠰᠠᠨᠠᠭᠠᠴᠢᠯᠭᠠ ᠪᠤᠶᠤ ᠳᠤᠷᠠᠰᠢᠯ ᠠᠴᠠ ᠪᠠᠨ ᠤᠪᠤᠭ ᠭᠠᠷᠪᠠᠯᠢ ᠶᠢᠨ ᠨᠡᠷᠡ | ᠪᠠᠨ ᠵᠤᠳᠤᠭ ᠤᠨ ᠳᠤᠯᠢ ᠳᠡᠭᠡᠷᠡ ᠰᠡᠶᠢᠯᠭᠦ ᠪᠤᠶᠤ ᠨᠤᠳᠤᠭ ᠤᠰᠤᠨ ᠤ ᠨᠡᠷᠡ ᠪᠠᠨ ᠰᠡᠶᠢᠯᠭᠦ ᠭᠡᠳᠡᠭ ᠵᠦᠭ | ᠭᠦᠭᠵᠢᠵᠤ ᠪᠠᠶᠢᠭᠠ ᠶᠤᠮ᠃ ᠡᠨᠡ ᠨᠢ ᠮᠦᠨ ᠠᠰᠣᠷᠣ ᠳᠤᠮᠤ ᠪᠡᠯᠭᠡᠳᠡᠯ ᠤᠨ ᠤᠳᠬᠠ ᠰᠠᠨᠠᠭᠠ ᠲᠠᠢ ᠪᠠᠶᠢᠳᠠᠭ᠃ | ᠮᠤᠩᠭᠤᠯ ᠪᠦᠭᠡ ᠨᠤᠳᠤᠭ ᠢᠶᠠᠷ ᠢᠶᠠᠨ ᠤᠪᠤᠭᠯᠠᠵᠤ ᠪᠠᠷᠢᠯᠳᠤᠳᠠᠭ ᠪᠤᠯᠬᠤᠷ ᠵᠤᠳᠤᠭ ᠤᠨ ᠳᠤᠯᠢ ᠳᠡᠭᠡᠷᠡ ᠨᠤᠳᠤᠭ | ᠤᠰᠤᠨ ᠤ ᠨᠡᠷᠡ ᠶᠢ ᠳᠡᠮᠳᠡᠭᠯᠡᠵᠤ ᠲᠠᠯᠪᠢᠭᠰᠠᠨ ᠠᠴᠠ ᠳᠡᠷᠡᠭᠦ ᠨᠤᠳᠤᠭ ᠤᠨ ᠠᠯᠳᠠᠷ ᠬᠠᠮᠢᠭᠠ ᠭᠠᠵᠠᠷ ᠲᠠᠭᠤᠷᠢᠰᠤᠨ | ᠡᠨᠡᠭᠦ ᠪᠦᠭᠡ ᠪᠠᠷ ᠪᠠᠭ᠋ᠠᠷᠬᠠᠬᠤ ᠰᠡᠳᠬᠢᠯᠭᠡ ᠡᠭᠦᠰᠳᠡᠭ ᠪᠠᠶᠢᠨᠠ᠃ ᠡᠨᠡ ᠪᠤᠯ ᠨᠤᠳᠤᠭ ᠤᠰᠤ ᠪᠠᠨ ᠳᠡᠭᠡᠳᠤᠯᠡᠭᠦ | ᠪᠡᠯᠭᠡᠳᠡᠯ ᠤᠨ ᠰᠢᠨᠵᠢ ᠶᠤᠮ᠃ ᠮᠤᠩᠭᠤᠯ ᠪᠦᠬᠡ ᠶᠢᠨ ᠵᠤᠳᠤᠭ ᠤᠨ ᠳᠤᠯᠢ ᠶᠢ ᠶᠡᠬᠡᠩᠭᠢ ᠳᠡᠭᠡᠨ ᠳᠤᠭᠤᠷᠢᠭ ᠭᠡᠯᠪᠡᠷᠢ | ᠲᠠᠢ ᠬᠢᠳᠡᠭ ᠪᠦᠭᠡᠳ ᠭᠡᠷᠡᠭᠴᠡᠭᠡ ᠪᠠᠨ ᠦᠨᠳᠦᠰᠦᠯᠡᠨ ᠬᠠᠶᠠ ᠵᠠᠷᠢᠮ ᠳᠠᠭᠠᠨ ᠲᠡᠭᠰᠢ ᠲᠦᠷᠪᠡᠯᠵᠢᠨ᠂ ᠤᠷᠳᠤ | ᠲᠦᠷᠪᠡᠯᠵᠢᠨ ᠭᠡᠯᠪᠡᠷᠢ ᠶᠢ ᠴᠤ ᠠᠰᠢᠬᠯᠠᠳᠠᠭ᠃ ᠲᠦᠷᠪᠡᠯᠵᠢᠨ ᠭᠡᠯᠪᠡᠷᠢ ᠨᠢ ᠡᠭᠡ ᠭᠠᠵᠠᠷ ᠢ ᠪᠡᠯᠭᠡᠳᠡᠵᠤ ᠳᠤᠭᠤᠷᠢᠭ | ᠭᠡᠯᠪᠡᠷᠢ ᠨᠢ ᠡᠴᠢᠭᠡ ᠲᠡᠭᠷᠢ ᠨᠠᠷᠠ ᠰᠠᠷᠠ ᠶᠢ ᠪᠡᠯᠭᠡᠳᠡᠳᠡᠭ ᠭᠡᠵᠤ ᠨᠠᠰᠤᠳᠠᠳ ᠬᠠᠭᠤᠴᠢᠯᠠᠳᠠᠭ᠃ | ᠮᠤᠩᠭᠤᠯ ᠪᠦᠭᠡ ᠶᠢᠨ ᠵᠤᠳᠤᠭ ᠨᠢ ᠮᠠᠰᠢ ᠭᠦᠨᠳᠤ ᠴᠢᠬᠢᠮᠠᠢ ᠪᠠᠶᠢᠭᠰᠠᠨ ᠠᠴᠠ ᠪᠠᠨ ᠤᠳᠤ ᠦᠶᠡ ᠳᠤ | ᠢᠷᠡᠭᠡᠳ ᠮᠠᠰᠢ ᠭᠦᠩᠭᠡᠷᠡᠭᠰᠡᠨ ᠪᠠᠶᠢᠳᠠᠯ ᠪᠢᠳᠡᠨ ᠳᠤ ᠠᠵᠢᠬᠯᠠᠭᠳᠠᠳᠠᠭ᠃ ᠪᠢᠳᠡᠭᠦᠤ ᠡᠩᠭᠡᠷ ᠲᠠᠢ ᠰᠢᠷᠢᠨ ᠵᠤᠳᠤᠭ | ᠤᠨ ᠦᠶᠡ ᠳᠤ ᠭᠦᠮᠦᠰ ᠶᠠᠭ ᠯᠡ ᠳᠤᠭᠤᠯᠭᠠ ᠡᠮᠦᠰᠦᠭᠰᠡᠨ ᠶᠠᠩᠵᠤ ᠲᠠᠢ ᠪᠠᠶᠢᠭᠰᠠᠨ ᠪᠤᠯ ᠤᠳᠤ ᠦᠶᠡ ᠳᠤ | ᠭᠦᠷᠴᠤ ᠢᠷᠡᠭᠡᠳ ᠮᠠᠰᠢ ᠶᠡᠭᠡ ᠵᠦᠢᠯ ᠨᠢ ᠭᠡᠷᠡᠭᠴᠡᠭᠡ ᠠᠴᠠ ᠪᠤᠯᠵᠤ ᠰᠢᠨᠡᠴᠢᠯᠡᠭᠳᠡᠭᠰᠡᠨ ᠪᠠᠶᠢᠳᠠᠭ᠃ ᠡᠨᠡ ᠨᠢ | ᠳᠡᠯᠡᠭᠡᠢ ᠨᠡᠶᠢᠳᠡᠴᠢ ᠪᠠᠶᠢᠳᠠᠯ ᠳᠤ ᠤᠶᠢᠷᠠᠳᠤᠨ ᠲᠠᠰᠴᠤ ᠪᠠᠶᠢᠭᠠ ᠲᠦᠯᠦᠪ ᠬᠠᠷᠠᠭᠳᠠᠳᠠᠭ᠃ | ᠮᠤᠩᠭᠤᠯ ᠪᠦᠭᠡ ᠶᠢᠨ ᠵᠤᠳᠤᠭ ᠲᠤ ᠮᠠᠰᠢ ᠬᠦᠨᠵᠡᠭᠡᠢ ᠭᠦᠨᠳᠦᠯᠡᠯ ᠤᠨ ᠤᠴᠢᠷ ᠤᠳᠬᠠ ᠤᠷᠤᠰᠢᠳᠠᠭ᠃ | ᠪᠦᠭᠡ ᠭᠦᠮᠦᠨ ᠵᠤᠳᠤᠭ ᠢᠶᠠᠨ ᠳᠡᠭᠡᠳᠤᠯᠡᠵᠤ ᠬᠦᠯ ᠬᠤᠷᠢᠭ ᠲᠠᠢ ᠭᠠᠵᠠᠷ ᠡᠪᠬᠢᠵᠤ ᠲᠠᠯᠪᠢᠳᠠᠭ᠃ ᠰᠠᠶᠢᠨ ᠪᠦᠭᠡ | ᠵᠤᠳᠤᠭ ᠢᠶᠠᠨ ᠪᠠᠷᠤᠭ ᠤᠨ ᠭᠦᠮᠦᠨ ᠳᠤ ᠵᠢᠭᠡᠯᠡᠭᠦᠯᠵᠤ ᠡᠮᠦᠰᠭᠡᠳᠡᠭ ᠦᠭᠡᠢ᠃ ᠬᠡᠷᠪᠡ ᠵᠢᠭᠡᠯᠡᠭᠦᠯᠭᠦ ᠳᠤ ᠭᠦᠷᠪᠡᠯ | ᠦᠪᠡᠷ ᠤᠨ ᠳᠤᠭᠤᠳᠠᠭ ᠢᠷᠡᠭᠡᠳᠤᠢ ᠲᠠᠢ ᠵᠠᠯᠠᠭᠤ ᠳᠤ ᠡᠮᠦᠰᠭᠡᠵᠤ ᠪᠤᠯᠳᠠᠭ ᠵᠠᠩᠰᠢᠯ ᠪᠤᠢ᠃ ᠵᠤᠳᠤᠭ ᠢ ᠰᠢᠷᠤᠢ | ᠳᠡᠭᠡᠷᠡ ᠲᠠᠯᠪᠢᠬᠤ ᠦᠭᠡᠢ ᠵᠠᠩᠰᠢᠯ ᠪᠠᠶᠢᠳᠠᠭ ᠤᠴᠢᠷ ᠠᠴᠠ ᠪᠠᠷᠢᠯᠳᠤᠬᠤ ᠦᠭᠡᠢ ᠦᠶᠡ ᠳᠤ ᠪᠦᠰᠡᠯᠡᠵᠤ ᠶᠠᠪᠤᠳᠠᠭ᠃ | ᠨᠡᠩ ᠴᠤ ᠵᠤᠳᠤᠭ ᠳᠡᠭᠡᠷᠡ ᠰᠠᠭᠤᠬᠤ ᠪᠤᠯ ᠮᠠᠰᠢ ᠭᠦᠨᠳᠦᠯᠡᠯ ᠦᠭᠡᠢ ᠦᠢᠯᠡᠳᠤᠯ ᠶᠤᠮ᠃ ᠪᠠᠷᠢᠯᠳᠤᠬᠤ ᠪᠠᠷ | ᠵᠤᠳᠤᠭᠯᠠᠵᠤ ᠪᠤᠢ ᠪᠦᠭᠡ ᠶᠢᠨ ᠵᠤᠳᠤᠭ ᠤᠨ ᠰᠡᠨᠵᠢ ᠠᠴᠠ ᠪᠠᠷᠢᠬᠤ ᠵᠡᠷᠭᠡ ᠪᠤᠯ ᠴᠡᠭᠡᠷ ᠲᠠᠢ ᠶᠤᠮ᠃ | ᠮᠤᠩᠭᠤᠯ ᠪᠦᠭᠡ ᠶᠢᠨ ᠵᠤᠳᠤᠭ ᠤᠨ ᠭᠦᠭᠵᠢᠯ ᠠᠴᠠ ᠮᠤᠩᠭᠤᠯ ᠪᠦᠭᠡ ᠶᠢᠨ ᠭᠦᠭᠵᠢᠯ ᠬᠠᠷᠠᠭᠳᠠᠳᠠᠭ᠃ | ᠮᠤᠩᠭᠤᠯ ᠪᠦᠭᠡ ᠶᠢᠨ ᠵᠤᠳᠤᠭ ᠨᠢ ᠲᠠᠶᠠᠭᠠᠷ ᠮᠤᠩᠭᠤᠯᠴᠤᠳ ᠤᠨ ᠪᠦᠭᠡ ᠶᠢᠨ ᠪᠠᠷᠢᠯᠳᠤᠭᠠᠨ ᠳᠤ ᠳᠤᠳᠠᠭᠳᠠᠵᠤ | ᠪᠤᠯᠤᠰᠢ ᠦᠭᠡᠢ ᠨᠡᠶᠢᠳᠡᠮ ᠤᠨ ᠬᠡᠷᠡᠭᠯᠡᠭᠡ ᠪᠤᠯᠤᠭᠰᠠᠨ ᠤ ᠬᠤᠪᠢ ᠳᠤ ᠳᠡᠭᠦᠨ ᠢ ᠠᠰᠢᠬᠯᠠᠬᠤ ᠳᠡᠭᠦᠨ ᠢ ᠰᠢᠨᠡᠴᠢᠯᠡᠭᠦ | ᠨᠢ ᠭᠡᠷᠡᠭᠴᠡᠭᠡ ᠠᠴᠠ ᠱᠠᠭᠠᠷᠳᠠᠭᠳᠠᠭᠰᠠᠨ ᠪᠠᠶᠢᠬᠤ ᠶᠤᠰᠤ ᠲᠠᠢ᠃ ᠬᠠᠷᠢᠨ ᠦᠨᠦᠳᠤᠷ ᠤᠨ ᠬᠢ ᠰᠢᠭ ᠰᠠᠨᠠᠭᠠᠨ | ᠳᠤᠷᠡ ᠪᠠᠷ ᠢᠶᠠᠨ ᠦᠭᠡᠷᠡᠴᠢᠯᠡᠭᠡᠳ ᠪᠠᠶᠢᠵᠤ ᠪᠤᠯᠬᠤ ᠦᠭᠡᠢ᠃ ᠪᠢᠳᠡ ᠡᠷᠳᠡ ᠦᠶᠡ ᠠᠴᠠ ᠠᠪᠤᠭᠠᠳ ᠮᠤᠩᠭᠤᠯ | ᠪᠦᠭᠡ ᠶᠢᠨ ᠡᠯᠡ ᠬᠡᠷᠡᠭᠴᠡᠭᠡᠨ ᠤ ᠵᠦᠢᠯ ᠳᠤ ᠰᠢᠨᠡᠴᠢᠯᠡᠯᠳᠡ ᠬᠢᠵᠤ ᠪᠠᠶᠢᠭᠰᠠᠨ ᠠᠴᠠ ᠪᠢᠰᠢ ᠦᠭᠡᠷᠡᠴᠢᠯᠡᠨ | ᠬᠤᠪᠢᠷᠠᠭᠤᠯᠵᠤ ᠪᠠᠶᠢᠭᠠ ᠦᠭᠡᠢ ᠭᠡᠳᠡᠭ ᠢ ᠵᠤᠳᠤᠭ ᠤᠨ ᠳᠡᠤᠭᠡ ᠪᠢᠳᠡᠨ ᠳᠤ ᠶᠠᠷᠢᠵᠤ ᠪᠠᠶᠢᠨᠠ᠃ ᠡᠶᠢᠮᠤ ᠰᠡᠷᠡᠯ | ᠰᠡᠳᠬᠢᠬᠦᠢ ᠲᠠᠢ ᠪᠠᠶᠢᠬᠤ ᠨᠢ ᠭᠦᠭᠵᠢᠯ ᠳᠤ ᠤᠶᠢᠷᠡ ᠪᠠᠶᠢᠭᠠ ᠶᠢᠨ ᠳᠡᠮᠳᠡᠭ ᠪᠤᠯᠬᠤ ᠠᠴᠠ ᠪᠢᠰᠢ ᠪᠠᠷᠢᠨ ᠲᠠᠯᠪᠢᠨ | ᠦᠭᠡᠷᠡᠴᠢᠯᠡᠭᠦ᠂ ᠬᠤᠪᠢᠷᠭᠠᠬᠤ ᠨᠢ ᠦᠰᠦᠳ ᠦᠭᠡᠷᠡ ᠵᠦᠢᠯ ᠢ ᠪᠤᠢ ᠪᠤᠯᠭᠠᠬᠤ ᠠᠴᠠ ᠪᠢᠰᠢ ᠤᠯᠠᠮᠵᠢᠯᠠᠨ | ᠬᠠᠳᠠᠭᠠᠯᠠᠬᠤ ᠳᠤ ᠦᠢᠯᠡᠴᠢᠯᠡᠵᠤ ᠴᠢᠳᠠᠳᠠᠭ ᠦᠭᠡᠢ᠃ ᠪᠢᠳᠡ ᠪᠦᠭᠡ ᠪᠠᠨ ᠦᠪᠡᠷ ᠤᠨ ᠵᠠᠭᠪᠤᠷ ᠢᠶᠠᠷ ᠨᠢ ᠪᠠᠶᠢᠯᠭᠠᠬᠤ | ᠭᠡᠷᠡᠭᠲᠡᠢ᠃ ᠳᠡᠭᠦᠨ ᠢ ᠦᠪᠡᠷ ᠤᠨ ᠬᠢᠨᠢ ᠵᠢᠷᠤᠮ ᠤᠨ ᠲᠠᠭᠠᠤ ᠵᠠᠶᠠᠭ ᠲᠢᠭ᠋ ᠤᠨ ᠲᠠᠭᠠᠤ ᠦᠷᠭᠦᠯᠵᠢᠯᠡᠨ | ᠰᠠᠶᠢᠵᠢᠷᠠᠭᠤᠯᠤᠨ ᠰᠢᠨᠡᠴᠢᠯᠡᠭᠦ ᠭᠡᠷᠡᠭᠲᠡᠢ᠃ |